BORRADOR PARA DEBATE
Proposta para a creación dun plan municipal de vivenda en réxime de alugueiro social no concello da Pobra do Caramiñal
Introdución
O Concello da Pobra do Caramiñal enfróntase a unha situación complexa no ámbito demográfico e residencial. Por unha banda, constátase unha perda continuada de poboación, acompañada de serias dificultades para que a mocidade e as familias novas accedan a unha vivenda en alugueiro a prezos accesibles. Esta realidade provoca que persoas con fortes vínculos familiares, sociais e laborais no municipio se vexan obrigadas a instalarse noutros concellos.
Por outra banda, o Barbanza está a converterse nun territorio atractivo para persoas procedentes doutras zonas de Galicia, doutras comunidades e mesmo doutros países, que buscan asentarse aquí. Esta chegada supón unha oportunidade para frear o despoboamento e fortalecer a diversidade social, mais require dunha oferta suficiente de vivenda que permita ás novas familias integrarse na comunidade.
Neste contexto, é urxente que o concello desenvolva un Plan Municipal de Vivenda en Réxime de Alugueiro Social que combine diferentes medidas: a creación dun parque municipal de vivenda social, a mobilización de vivenda baleira, o apoio á rehabilitación de inmobles e a posta en marcha de axudas directas ao alugueiro para familias novas con fillos, co fin de favorecer tanto a permanencia da poboación local como a chegada e integración de nova veciñanza.
O obxectivo último é garantir o dereito a unha vivenda digna e adecuada (artigo 47 da Constitución Española), contribuíndo á cohesión social, á conciliación familiar e á revitalización demográfica e económica da Pobra do Caramiñal.
Oxectivos
1. Crear un Parque Municipal de Vivenda en Réxime de Alugueiro Social, con especial prioridade para a poboación nova e familias con arraigo no municipio.
2. Incentivar a mobilización de vivenda baleira existente no concello, en mans de pequenos propietarios, para destinala a alugueiro residencial.
3. Reforzar a cohesión social e contribuír á fixación de poboación no municipio.
4. Promover a rehabilitación do parque de vivenda existente, mellorando a súa eficiencia enerxética e accesibilidade.
Liñas de actuación
Liña 1. Creación dun Parque Municipal de Vivenda Social
· Compra directa de vivendas de segunda man en bo estado ou en proceso de rehabilitación, con cargo a fondos municipais e/ou subvencións autonómicas/estatais.
· Solicitude de colaboración co IGVS para a cualificación das vivendas como protexidas e para a súa xestión coordinada (se se considera necesario).
· Posibilidade de convenio para que a xestión se faga polo IGVS ou polo propio Concello, garantindo sempre procedementos de adxudicación públicos e obxectivos.
Liña 2. Mobilización de vivendas baleiras
· Campaña local de información e sensibilización para propietarios de vivendas baleiras sobre as vantaxes de poñelas no mercado de alugueiro.
· Posta en marcha dun programa municipal de intermediación en alugueiro, con:
o Seguro de impagos cuberto polo concello.
o Axudas á rehabilitación e mellora da vivenda para destinala a alugueiro.
o Convenios cos propietarios garantindo alugueiros sociais estables.
Liña 3. Apoio á rehabilitación de vivendas para destinalas a alugueiro social
O Concello da Pobra do Caramiñal difundirá e facilitará información sobre as convocatorias de axudas á rehabilitación de vivendas convocadas pola Xunta de Galicia a través do IGVS
De xeito complementario, habilitarase un punto de atención municipal para orientar ás persoas interesadas na busca de información, derivándoas cando sexa preciso ao IGVS, que é o organismo competente para a tramitación destas axudas.
As accións concretas a desenvolver serán:
Información e difusión:
Ø Publicación en medios municipais (web, redes sociais, bandos, taboleiros) das convocatorias de axudas.
Ø Organización de sesións informativas para veciños e propietarios.
Acompañamento técnico:
Ø Habilitar un servizo municipal de apoio para orientar na tramitación das solicitudes ao IGVS (cubrimento de formularios, revisión de documentación, envío telemático).
Ø Priorizar a captación de vivendas baleiras susceptibles de destinarse a alugueiro social tras a rehabilitación.
Colaboración institucional:
Ø Solicitar ao IGVS a posibilidade de asinar un convenio de colaboración, que permita ao concello actuar como entidade colaboradora na difusión, recollida e seguimento de solicitudes.
Ø Explorar a creación dun fondo municipal complementario, co que o concello poida engadir unha axuda adicional ás persoas propietarias que rehabiliten vivendas para dedicalas a alugueiro social no termo municipal.
Liña 4. Axudas municipais ao alugueiro para familias novas con fillos
Co obxectivo de favorecer o asentamento de poboación nova no municipio e apoiar a conciliación familiar, o Concello da Pobra do Caramiñal creará unha liña de axudas directas ao alugueiro para familias con fillos e fillas menores ao seu cargo.
Estas axudas terán carácter complementario ás convocadas pola Xunta de Galicia a través do IGVS, de maneira que non se solapen senón que reforcen a súa eficacia.
Os principios básicos desta liña serán:
Ø Beneficiarios: persoas ou unidades familiares empadroadas na Pobra cunha antigüidade mínima (ex. 1 ano), con fillos/as menores de idade ao seu cargo.
Ø Condicións económicas: ingresos limitados (ata x veces o IPREM ou segundo se acorde en pleno), dando prioridade a situacións de vulnerabilidade.
Ø Vivenda obxecto da axuda: debe tratarse de vivenda habitual en alugueiro, con contrato legal en vigor e fianza depositada no IGVS.
Ø Importe da axuda: unha contía mensual ou anual a tanto alzado (cantidade fixa única, independente do que gaste ou cobre a persoa beneficiaria), que se establecerá en función da dispoñibilidade orzamentaria do concello.
Ø Convocatoria pública e transparente, con baremo obxectivo (criterios de ingresos, número de fillos/as, situación de vulnerabilidade, etc.).
Mecanismos de xestión
Ø Aprobación plenaria da posta en marcha do Plan Municipal de Vivenda en Alugueiro Social.
Ø Creación dunha liña orzamentaria específica nos presupostos municipais para adquisición e rehabilitación de vivendas.
Ø Solicitude formal ao IGVS de colaboración técnica e financeira (se procede).
Ø Establecemento dun Regulamento Municipal de Acceso ás Vivendas Sociais, que garanta:
o Criterios de prioridade para persoas empadroadas ou con vínculos familiares/laborais no municipio.
o Transparencia e obxectividade na adxudicación.
o Compatibilidade co Rexistro Único de Demandantes de Vivenda de Galicia cando se trate de vivenda protexida oficial.
o Criterios de prioridade para persoas empadroadas ou con vínculos familiares/laborais no municipio.
o Transparencia e obxectividade na adxudicación.
o Compatibilidade co Rexistro Único de Demandantes de Vivenda de Galicia cando se trate de vivenda protexida oficial.
Beneficios esperados
- Incremento inmediato da oferta de vivenda en alugueiro asequible no municipio.
- Retención da mocidade e fixación de novas familias na Pobra.
- Redución do número de vivendas baleiras, poñendo en valor o parque xa existente.
- Reforzo da cohesión social, dinamización económica local e contribución á sustentabilidade ambiental mediante rehabilitación enerxética.
- Apoio directo ás familias novas con fillos, reducindo o esforzo económico que supón o alugueiro.
- Fomento da conciliación e estabilidade familiar, creando condicións máis favorables para a crianza no municipio.
- Retención e atracción de poboación nova, que é o segmento que máis emigra por falta de vivenda accesible.
- Incremento
da cohesión social, ao complementar as outras
medidas estruturais (parque municipal, mobilización de vivenda baleira e
rehabilitación).
