Gobernar é só xestionar ou tamén transformar?

 

Hai gobernos municipais que parecen entender a súa responsabilidade como unha tarefa fundamentalmente administrativa: xestionar os recursos dispoñibles, executar os orzamentos, manter as infraestruturas, realizar algunhas obras e resolver os problemas que van aparecendo.

Todo iso é necesario. Pero é suficiente para gobernar unha vila?

Eu creo que non.

Gobernar debería significar tamén ter unha visión de conxunto da vila, coñecer as súas necesidades, identificar os seus problemas e potencialidades e, sobre todo, ter un proxecto para mellorar a vida presente e futura da súa veciñanza.

Non abonda con manter o que xa existe. Hai que preguntarse que falta, que non funciona, que desigualdades debemos combater, que oportunidades podemos crear e como queremos que sexa a nosa vila dentro de dez ou vinte anos.

E iso require algo máis que unha relación de obras e actuacións illadas.

Require entender que a vivenda, o emprego, o comercio, a actividade empresarial, os servizos públicos, os coidados, a conciliación, a igualdade, a educación, o deporte, a cultura ou a participación cidadá forman parte dunha mesma realidade. Que as decisións nun ámbito inflúen nos demais e que, por tanto, as políticas municipais deben responder a un proxecto común, coherente e transversal.

E require tamén mirar cara ao futuro, especialmente nun momento no que o cambio climático nos obriga a repensar o urbanismo, as infraestruturas, a protección ambiental e a seguridade da poboación.

Estamos preparando as nosas vilas para afrontar as consecuencias do cambio climático? Estamos anticipándonos aos riscos ou agardamos a que os problemas aparezan para buscar solucións?

Estas preguntas deberían formar parte central de calquera proxecto de goberno municipal.

Gobernar unha vila require coñecemento, planificación, participación cidadá, coordinación entre as distintas áreas e vontade política para transformar aquilo que necesita cambiar.

Non se trata de gastar máis por gastar, nin de facer obras para poder presentar unha longa lista de actuacións ao final dun mandato. Trátase de saber para que se fan, que necesidades resolven, como se relacionan entre si e que contribución realizan ao futuro da vila.

Un goberno pode executar correctamente os seus orzamentos e, con todo, deixar pasar catro anos sen avanzar na solución dos problemas estruturais da súa vila.

Porque xestionar o presente é unha obriga de calquera goberno. Pero pensar o futuro, planificalo e traballar para transformar a realidade é o que lle dá sentido a un verdadeiro proxecto político.

E como veciñanza non deberiamos conformarnos con menos.

Non queremos só vilas que funcionen. Queremos vilas que avancen, que coiden das persoas, que creen oportunidades e que estean preparadas para o futuro.

E para iso non abonda con ter un goberno que administre. Necesitamos gobernos que teñan un proxecto de vila e a vontade de facelo realidade.